اس ام اس

اس ام اس

احم احم النميمه النهارده كانت نوع تانى خالص
نوع من النميمه الدوليه مش قعده ستات ولا حتى قعده عرب لا دى على وسع
امال ,,,احنا مش بنهزر لما ننم هنم بزمه وضمير
احكيلكوا من البدايه
اتفقنا انا وصحباتى نتجمع يوم الجمعه بالبيت وننم حبه على خلق الله

وطبعا اليومين دول كل جمعه مش عاديه خالص
اوعا حد يفهمنى غلط
او يقولى تقصدى جمعه الثوره والمظاهره,, لالا المقصود هنا جمعه تانيه خالص
عقبال املتكوا كده احنا بنتابع جمعه البرايم
يطلع واحد متفزلك ويقولى يعنى ايه برايم
ده عقبال السامعين لما يكون عندك حنجره اوبراليه
او حتى وسط مخلوع او لو نصفك القدر وطلعت واد من بتوع سوسو وتوتو وتدخل ستار اكاديمى
ويا هنياله بقا وتبقا امه داعيه له لو فلت من النومنيه
كده يبقا التوب فايف

الخلاصه يا جماعه اننا قاعدين لبرنامج الريل تى فى المشهور طبعا ستار اكاديمى
ودى تامن سنه نقعد له القعده السوده دى
اصل الرصيد بيخلص ونستلف ونتداين عشان نصوط للستار اللى عاوزينه يكسب ويفضل قاعد بالاكاديميه
اصل لما يفوز هيفرق علينا عيش وفول نابت

من هنا اتلمينا وجهزنا سندوتشات وحلويات وقعدنا على اعصابنا
واحده نفسها حسام يفضل اصل ساره اللى بتحبه هتزعل موت لو خرج
والتانيه هتموت لو طلع ومش هتشوفه تانى اصل واد من الاخر.............. محدش يفهم صح
من هنا الكل مسك موبايله وهات يا اس ام اس ورسايل ابصر ايه ومدرك ايه

صرفنا؟؟ اه
خلصنا الرصيد؟؟ اه
حسام خرج؟؟ اه
طبعا انتهى البرايم واحنا بعد الهزار والضحك والقلق اتنكدنا
لان اسم النبى حارسه وصاينه ويحميه لشبابه خرج
من الاخر
ضاعت فلوسك ياصابر
واتنصب علينا

طب هو مين نصب علينا
وهو احنا بس ده ملايين من كل الدول بتصوت
يعنى النصب دولى مش محلى وبكامل ارادتنا
والقانون لا يحمى المغفلين ..احم احم اقصد الناصحين
الغريب ان المسابقه دى حصدت ملايين ومليارات من الفلوس
الانكت بقا انها اسهل طريقه ننصب بيها على نفسنا
اه طلعنا نصابين
المشكله الاغرب ان الاولاد بعمر الاعدادى والثانوى استهلكوا فلوس الدروس الخصوصيه بهدف التصويت
يعنى خراب من كله
طبعا غير الحاجات الغير مقبوله اللى بنشوفها
من احضان وعلاقات وحمام سباحه مشتركوكاميرات مراقبه بكل مكان
وطبعا تكلفه الحفلات والموسيقين والاجهزه والمدرسين
مين هيدفع ده كله!!!!
احنا بلاشك
كل اسبوع نصووووووت
وفى الاخر اللي بيكسب
لاعمره قالى شكرا ولا دفعلي تمن الكارت

ابسط مثال اول ستار المصرى
والملايين صوتت وخرج النجم ولكن بعد خروجه هبطت نجوميته
يبقا كده من الاخر ضحكوا عليك ياخايب وشيلوك البطاطا زكايب
وبما انى من عشاق البطاطا ,,,فانا شيلت الزكايب
ومازلنا بنشيل
سؤالنا
هل وصل بينا الحال لدرجه التفاعل مع برنامج لاهدار مالنا؟
ملايين من النقود ممكن تساعد اسر فقيره بلا مأوى واحنا بنصوت بيها لبرنامج؟
وعجبى
وانتظرونى بالحلقه القادمه

بقلم
sodfa

زياره فول

الحلقه السادسه
زياره فول

امبارح على حين غره جالنا زياره من البلد اشى فطير مشلتت واشى جبن قريش ولبن طازه من ابو قشطه بالكيلو ده وطبعا ماقولوكوش على البط والوزه اللى فضحتنا وسط الجيران
طول النهار والليل تكاكى ولا اللى بتقول للجيران اللحمه جت ياناس
حسيت ان الوزه دى منظوره من قبل ما نتهنى بدبحها وكل ما ادخل ابصلها تجرى منى برقبتها الطويله دى يعنى على ماندبحها تكون امه لا اله الا الله اتفرجت علينا
كل ده حلو وجميل وسهل حاجه من الايد للبوق علطول جينا بقا لاخر الزياره شوال فول من اللى قلبك يحبه
اصل خلاص احنا مقطعينها مدمس ليل ونهار مخنا هنج منه
وطبعا شوال رز اصل اليومين دول الرز بقا فى الغالى يعنى اللى يلحق بقا
طبعا المفروض انى انقى الفول والرز اكيد من دنيبه وطوب
وقد كان قعده بصوانى وانقى واشيل


ولما صدقت خلصت وقلت اخيرا خلصت ,امى الله يصبحها ويمسيها بالف خير قال ايه اندلق الرز والفول مع بعض
وتعالى ياستى وافصلى الاتنين عن بعض يعنى مش بس هنقى لا وهفصل بقا
تقولوش هفصل القوات المسلحه وافصل ما بين مدرعات ومشاه
بقا حالى زى ماتقولوا كده واحد بيغرق وسط شوال رز بلولوق بلولوق
فى حل تانى!!! طبعا مفيش قلت اعمل اللى عليا وانجز
بعد حبتين لقيت امى المصونه والدره المكنونه بتنادى قال ايه لازم اعبى كل نص كيلو فى كيس لوحده عشان التخزين ولازم اوزن يعنى ميزان الدهب
والطبيعى هاخد فيها اعدام بميدان عام اصل خلاص لو زادت فوله او نقصت هنتقدم لمحاكمه عسكريه

كيست ووزنت وخلصت جه دور انى ابدا ادمس الفول واول ما يغلى نهدى النار وياخدله 5 او6 ساعات فواله وتراقبى كل شويه لحسن لو شاط الفول انا مش مسئول
فى عقل بالى وهو ايه اخره الغلبه دى ما بنص جنيه فول جاهز واخلص روحى ولا ساندوتشات لما يجيلنا مزاج له
انقى وافصل واوزن واكيس واسوى واهدى وبالاخر هو هو برده اسمه فول
وسألت امى انتى ليه بتعذبى فيا هو انا بنت الجيران يعنى
بكل بساطه اكتشفت ان كل ده مقصود انى انقى وتلخبطهم على بعض وافصل تانى واراقب تسويه
يعنى ده استغلال سلطات منزليه بقا وانا من هنا لهنا



كان المفروض اعمل ثوره واقولهم مش همد ايدى ولا ابص لفوله بعد كده
كان الرد التلقائى وبمنتهى البساطه
امال هتتعلمى الصبر ازاى!!!


يعنى يا امى هو لازم اتعلم الصبر لما يجى موقف ابقا اصبر الصبر مش واقف مستنينى يعنى
امى: ولما ولادك يكبروا وتساعديهم بمزاكره وتمرضيهم طول الليل ولما جوزك يحتاج مساعدتك ولما تكبرى بالسن وتتعبى هتصبرى على كل ده ازاى !!؟ لازم تتعلمى ومن قبلها
الدنيا مش كلمه بوقت عصبيه او حاجه زهقنا منها وخلاص نرميها
الدنيا صبر ,على عصبيه,على بلاء, على مرض ,على فقد عزيز
كده الدنيا مش هتصبر عليكى لو انتى مش صبرتى عليها
اتكلم انا؟!!طبعا محصلش ولا قدرت انطق
اصل الكلام بالصميم
ايوب صبر سنين هو صحيح انا مش ايوب بس على الاقل هقدر اتحمل كل اللى ممكن اصادفه عشان ارتاح فى حياتى


ودلوقت
العصبيه والتسرع تفتكر انهم اسرع وسيله للردعلى اى هجوم؟
لو انت مصبرتش على حد فى وقت زعله , تفتكر مين ممكن يصبر عليك بعصبيتك؟
اول قرار ممكن تاخده وانت متعصب بدون صبر هيكون هو نفسه وانت هادى وصابر؟
لو خسرت صديق وانت متعصب تفتكر كان ممكن ماتخسروش وانت هادى وصابر عليه؟
الصبر صفه تعلميه يعنى تقدر تتعلمها ,هل عندك استعداد انك تتعلم الصبر؟
وانتظرونى بالحلقه القادمه
بقلم
sodfa

القطه والسكين

القطه والسكين



ديك النهار فى قبل ما تتجوز بنت خالتى قعدت معها ومع البنات وكل واحده بتديها نصيحه قال يعنى بقت خبيره وهاتك يالوك لوك
قصقصى طيرك ليلوف بغيرك
ابنك على ما تربيه وجوزك على ما تعوديه
اتغدى بيه قبل ما يتعشى بيكى


ومن هنا كل واحده تنصح فى المثل من ايام الست فتاكات لغايه ام امتثال على الله العروسه تتنصح وتتوعى كده
تقولوش داخله حرب وبنمدها بالاسلحه والذخيره النوويه
اهم حاجه علطول تلاحقيه كان فين ورايح فين
وليلته سودا لو راح لامه من وراكى
وليلته اسود من قرن الخروب لو اكل عندها وسابك ياحيله تاكلى لوحدك
ساعتها تديهم له افردا وازواجا
والا ساعتها هيستوطى حيطك ويفتكرك هفيه
وان عملها مره انسى بقا هيبلط عند امه

واياكى تعرفيه بتقبضى كام والا هيقرفك بقا المصروف والبيت وتشاركى
والانيل لو جه تعبان وبسلامتك تقوليله مالك يا حبيبى كده هيقرش ملحتك
ويضحك عليكى بكلمتين ويطلعلك كل يوم بحجه شكل وبدل ما انتى تقوليله كنت عند الكوافير او الخياطه
يجى هو يقولك العربيه عطلت واتأخرت وابصر ايه ومدرك ايه
وهو داير يلف مع البيضه والسمرا وانتى قاعده تقشرى بصل
خليكى علطول ماسكه له ذله ميعرفش يفلفص
وخلى بالك الراجل زاد قرشه زاد كرشه
يطمع بقا ويفكر يغير الصنف
صنف الحريم يعنى مش حاجه تانى

احم احم
من هنا خلصت القعده والعروسه اتشحنت تمام امثال وحكم ومواعظ تخلى الاخرس ينطق
طبعا بعد كل ده كان لازم نشوف النتيجه على الطبيعه بقا وياترى ماشى حالها ولا اتوكست وجابتنا ورا
وطبينا عليها نشوف طبعا الابتسامه العريضه والفرح على وشها
يكونش بتدارى علينا انها متخانقه؟
لداهيه تكون مبسوطه مع جوزها يبقا تعبنا كله راح فشوش
دخل الزوج من الباب
:انت جيت يا حبيبى؟
طبعا سؤال غبى طالما دخل اكيد جه
:احضرك الغدا اكيد جعان انا مستنياك وسخنت الاكل مرتين
يا أزكى اخواتك طالما جاى وقت غدا يبقا اكيد مكلش وجعان ايه طقم الحنيه ده
حبه حبه يبيع ويشترى فيها ويتلت بقا ناقص ملح الاكل صايص فين اكلك يامه وهاتك يا تلقيح بقا
عجبنا الحال؟ لا معجبناش قلنا كل اللى نصحنا بيه البت عملت عكسه صحيح مرايه الحب عاميه

وبسؤال المحروسه
ياترى ايه اللى حصل قوام حنيتى وكل كلامنا راح بالهوا؟
قالت
كل واحد فينا خدله كلمتين ونصيحتين مين يمسك مسئوليه البيت ويبقا هو المسيطر
لقينا ان كل واحد فينا مسئول عن حاجه بيكملها مسؤليه التانى
يعنى هى لا حرب ولا خناقه له دوره وانا ليا دورى
الشاطر اللى يأدى دوره صح وعلى اكمل وجه ساعتها الكل هيكون مرتاح
عجبنا الكلام؟
اكيييييييد وعجبكم كمان
العبره مش مين يكون سى السيد لوحده
العبره مين يكون قد حمل مسؤليه اسعاد الطرف الاخر
ساعتها لا فى سكنيه ولا قطه ولا حتى اكياس

نيجى للواقع ونسيب حبه الخيال
*ياترى فى البيت مين هيكون سى السيد ولا خلاص الروس اتساوت؟
*امثال زمان وحكمها ياترى هى صح مليون بالميه وممكن فعلا يكون لها دور بحياتك؟
*بتستمع لكم النصائح وتنفذها ولا ممكن تفوت منها اللى ميدخلش دماغك وتقتنع بيه؟

وانتظرونى بالحلقه القادمه
sodfa

الغسيل المنشور

الجلسه الرابعه


الغسيل المنشور
كالعاده طالعه انشر الهدمتين فى الشمس الواحد مايصدق الشمس تهل فى البرد ده
جارتنا حمديه صبحت عليا وطبعا بعد الصباح والتحيه
الا لازم تشرفنا بطلعتها البهيه ودخلت تنورنا بخطوتها
ازيك يا زينه البنات عامله ايه وازيك يا حاجه الجو ياختى مش ناوى يتعدل يوم برد ويوم حر
يعنى المفروض اننا الارصاد الجويه للست حمديه

ودخلت الست حمديه تقعد مع الحاجه
اسكتى ياحاجه جوزى ليل ونهار هات ياخناق على مصروف البيت والحاجه غليت نار اقوله خد انت واتصرف
يقولى دى مسئوليتك يعنى اقطع نفسى كل يوم جمعيه شكل عشان دروس العيال ويجى اخر الليل مش طايقنى ولا طايق البيت
وحاطط وشه فى وش المنيل التليفزيون ويبصلى ويتحسر على شبابه
قال يعنى هو اللى لسه شباب يروح يبص فى المرايه والصلع جاب وشه لقفاه ياختى
ال ياختشى جوه وبرا فرشتلك وانت مايل ايه يعدلك
ولو قدت صوابعى العشره شمع بردو مش طمران فيه
وتضحك الست حمديه وتكركر وهات يا رغى كلت ودانا
وبدأت الوشوشه كلام محدش يسمعه بقا وكركركركر
ولا كلامها عن جيرانا الباقيين ومين طلق ومين سقط ومين رهنت دهبها
ياستى الله يصلح حالهم خليهم فى حالهم
ليه وليه قلت انا البوقين دول
اجرمت انا
وعلى ما قالت الى فيه النصيب كانت صينيه البطاطس ام لحمه شاطت ووصلت ريحتها لعندنا
من هنا قامت جرى على وعد انها تكمل باقى الحكاوى بكره

وانتهت الزياره بسلام وبلحظه فكرت بالست حمديه
جايه تنشر غسيلها عندنا مش مهم مغسول او مش مغسول بس دى متعه عندها زى اكل اللبان
وفى ستات بقا كل همها انها تنشر الغسيل ده زى المنشورات السياسه فى ودن كل جاره بكل الوسائل بقا
وعشان تضمن توصل الخبر لاكبر عدد بقا الموبايل هو الوسيله المضمونه
وعلى ماتوصل الخبر من فلان لعلان يكون التوابل والبهارات والتحابيش جابت مفعولها ولا احسن طبخه هنديه
وطبعا الزوج بقا الود وده يجيب لسان الست مراته ويختم عليه بختم غير صالح للاستهلاك الادمى


ومن هنا للواقع على ارضنا
* لو اكتشفت ان زوجتك \زوجك بتفشى اسرارك الخاصه واسرار بيتك للاصدقاء والجيران تصرفك ايه؟
* هل ممكن تستأمنى اقرب الناس لاسرارك وهو الزوج ؟
*لو جارتك او صديقتك بيفشوا اسرار بيوتهم كده ايه الحل معاهم هل النصح ولا الاكتفاء بالصمت؟
افشاء الاسرار الزوجيه ليس خطأ بل هو حرام شرعا
وانتظرونى بالجلسه القادمه
sodfa

للرجال فقط

للرجال فقط

زمان كان الكلام عن الولد ولما قالوا ده ولد انشد ضهرى واتسند على اساس انه لو بنت هيفضل ضهره محنى والعيب فى خلفته مش الديسك اللى جاله على كبر
قاعدين فى قعده زى دى وجه خبر ان الاخت هيلارى ناويه تعمل معرفش ايه وتبقا رئيسه بدل ما تخش الاخت تعملها طاجن مسقعه باللحمه المفرومه
لازم تقرفنا وتحسسنا اننا ستات بيوت مرحرحين وفاردين الشلت على المصطبه باعتبار اننا نساء الدول الناميه ,الى لسه بتحبى

خدنا الكلام رايح جاى بتوتوك الحاج اسماعيل يعنى اخر منجهه ونيجى شمال ونيجى يمين
وعم اسماعيل هات يا تنفيس عن اللى مخنوق منه
هى الست دلوقت طلع لها شنب ودقن وبدل ما تتكلم مع جارتها عن اخر قصه للشعر وطريقه الحنه اللى غلبت تطلع منها بلون عدل
ولا جوزها المعدول اللى نزل يجيب الخضار راجع بنصه مفعص وانضحك عليه ولا العيال الى كل واحد جايب ماشاء الله كحكه مزيته على كل ماده
بقت تتكلم فى السياسه
الحقوا كده النمله كلت عيالها معدش حد قادر عليهم صنف الحريم خدوا مننا الوظايف والاتوبيسات ووصلت كمان يتكلموا بالسياسه
ويقولك دى نص المجتمع ويطلع النص المايل اللى هياخدنا على اقرب ترعه وننزل فيها

ياشيخه روحى شوفيلك طبخه بدل ما التونه اللى حرقتى بيها قلبنا دى
وانصحك بلاش فرجه على الاخبار واخرك جرنال الاهرام تلمعى بيه قزاز النيش
ده طبعا كان كلام سواق التكتوك الى تقريبا كان شايط من مراته لما قالت له السياسه مش للرجاله وبس
طبعا واحنا المفروض نسكت ونوافق والا نلاقى نفسنا احنا وعجلات التكتوك على اول رصيف
من هنا كان ليا وقفه الا لو هو انا لو اتكلمت بالسياسه كده يبقا تخطينا الخط الاحمر يعنى واجوازنا يطلعوا لينا كارت احمر على بيت ابوكى ياشابه
هو لما تكون الست مثقفه ودماغها مفتحه حبتين وتحاور جوزها فى قعده صفا بدل قعده القهوه مع صحابه تبقا اذنبت
مالها السياسه
ليه نظرتنا للبنت اللى بتتكلم بالسياسه انها مسترجله وعامله راسها براس الرجل
وطبعا الرجل مش حابب حد يناقشه او حد يخالف رأيه
وبعدين بالاخر يقولها انتى ايشفهمك بالسياسه ده بحر وعلم
يعنى البيه مخضرم بقا ومن الحزب للمقر الرئاسى طول اليوم
وهو يطلع اخره يتفرج على العاشره مساء

نيجى للواقع بقا
*هل نظرتك للبنت اللى بتتحدث بالسياسه انها مسترجله؟
*هل تخشى الارتباط بفتاه تتكلم بكل المواضيع السياسيه خوفا من افتقار اللحظات الرومانسيه بالمرأه؟
هل السياسه تقتل انوثه المرأه؟
*هل تعتبر المرأه منافسا لك فتخشى ان يكون عقلها على علم ودرايه بما يحدث اكثر منك؟
*هل اهتمامك بالسياسه يقضى على اللمسات الشاعريه وطبيعتك كبنت؟
يعنى من الاخر
لا السياسه هتلغى طبيعه البنت ولا عدمها هتزود رومانسيتها
السياسه مثلها كمثل اى ثقافه تتزود بيها للعلم فقط
وليس للرجال فقط
وانتظرونى بالجلسه القادمه
sodfa

ام محروس لاحلى عروس

ام محروس لاحلى عروس

من اسبوع فات جاتلنا زياره على غير العاده ,ابن خالتى سعيد جاى يزور الحاجه عقبال املتكو كده جاى من الامارات بانت عليه القوبهه ,وعلى بابا بعد الضنى لابس حرير فى حرير, ياخالتى عاوز اجوز شوفيلى عروسه
الحاجه :عليك وعلى ام محروس جارتنا اللهلوبه عارفه كل كبارات البلد وبناتهم ,وممكن تاخد مع كل عروسه واحده استبن سبيشيال اوفر بقا و2 قبقاب حمام, وقوم بينا علطول حلاوتها فى حموتها كده
الحاجه :هنا بقا ياعم سعيد هتلاقى طلبك بس متنساش خالتك بالحلاوه , واكل العيش يحب الطعميه.

فتحت لنا الست ام محروس واهلا وسهلا منورين عندى ليكو احلى عرايس
سعيد فاتح بوقه ومستنى العرايس يمكن الدنيا هتمطر بنات اصل خلاص الواد قيمه وسيمه
ام محروس:دى عروسه بيضا وطويله وبنت مستشار يعنى مفيش كلمه تتقال وصورتها قمر 14
سعيد:حلوه طب اشوفها ونتوكل
وطبعا طلبت عموله الف جنيه , وان كان لك عن الكلب حاجه قوله ياسيدى.تمام ياسيدى
وخدنا بعضنا نزور العروسه وطبعا شايلين حاجه والا يتقال ده عريس قيحه وجلده من اول زياره
ودخلت العروسه بسم الله ماشاء الله طول بعرض درفه دولاب يعنى طالما عجبته محدش يقدر يقول بم
ام العروسه:بص يا ابنى احنا طلباتنا مش كتير بس اهم حاجه تسعد البت اللى حيلتى من الدنيا ومتكونش اقل من اى حد من بنات خالاتها
سعيد: اللى تشوفيه ياطنط انا شارى وان شاء الله مش هنختلف هو انا هتجوز كل يوم يعنى
من هنا العريس الحيله انطس فى نواضره وبقا ماشى زى ال....... اه هو ده

وكان الكلام عن القايمه
ام العروسه: بنت خالتها السنه اللى فاتت فى فرحها كتبت قايمه ب120 الف جنيه وانت ياباشمهندس عارف الاسعار كل يوم فى الطالع, على اساس ان كيلو الطماطم كان بجنيه بقا ب15 يعنى لما تعدى سنه يبقا زى جرام الدهب, يعنى ان شاء الله نكتبها ب150 الف
سعيد: طب الحاجه اللى هتيجى نشوف سعرها وتتكتب ولا ايه ونشوف توصل لكام
ام العروسه: انت يا باشمهندس ناسى الشبكه والهدايا دى لوحدها هتخش ب50 الف يعنى كده محسوبه بالملى
حاجبى اتعوج بقا تمانيه مقلوبه قلت بدل ما اطق انفس بكلمتين
ياطنط بس لما يتكلموا ويتفاهموا وهو مش هيستخسر فى مراته حاجه ولا فى بيته
ام العروسه: وهو انا قلت حاجه جديده البيوت كلها كده ده انت دخلت قلبى والله وحسيتك زى محمود ابنى
وعموما يا ابنى ادى صوره من قايمه بنت خالتها بمعلاقها بسكاكينها بسواطيرها كله متقيد

انا حسيت اننا بنمضى عقد شراء التلاجه زانوسى بفراخها بسلطاتها
العروسه دخلت مكسوفه طبعا وشها بالارض قال يعنى اول راجل تشوفه وهى الشوارع فيها ايه ستات وعربيات بس!!
وبسؤال العروسه عن متطلباتها جانا الرد :اللى تقول عليه ماما انا معرفش حاجه
طب يا عروسه هتجهزى ايه واحنا نجهز ايه ؟
طبعا لا حياه لمن تنادى وبننفخ بقربه مقطوعه
فى عقل بالى افتكرت المثل اللى بيقول اكفى القدره على فمها....تقع البنت على بوزها
المهم القايمه نكتب فيها الشبكه وتكون بسعر النهارده,على اساس ان الدولار كل يوم بارتفاع,
وكالعاده اتفشكل الموضوع بسبب القايمه والشبكه وتأتى الرياح ....محمله بالاتربه

من هنا كان الكلام ولكل مقام مقال
ليه تدفع كتير لما ممكن تدفع قليل
وبقت قايمتى نايبتى

*لو انت اب القايمه كبرت ولا صغرت هتكون اغلى عندك من حياه بنتك وسعادتها يعنى انا بشوف هيدينى كام واشيله الشوال ؟
*لو انتى العروسه تفتكرى ان شكلك كده مش كيس جوافه للى يكتب على نفسه مبلغ اكتر وخلى بالك الجوافه بتحمض علطول يعنى مش بتتخزن؟
*ايه الضمان اللى ممكن يضمن سعادتى فى بيتى قايمه ولا شيك ولا عفش هبيعه مستعمل بعد كده؟
*طب لو جوازه عن حب مستعد تكتب قايمه تضحيه منك للحب ده ولا تتنازل عن حبك اصل المسأله ممكن تبقا كلابوش؟
*طب لو انكتبت القايمه وطلع العريس مش يتعاشر من اصله هتتمسكى بقايمتك اللى ممكن تكون فى يوم من الايام نايبتك ولا هترمى كله المهم تخلصى؟
وانتظرونى بالجلسه القادمه
sodfa

ليله زفاف

الجلسه الاولى
ليله زفاف


اول امبارح صحينا على جرس التليفون الصبح بدرى قال ايه خالتو صفيه بنتها فرحها النهارده واحنا طبعا اول المعازيم
وبما اننا من اهل العروسه يعنى احنا صحاب الفرح من الاخر نتشيك ونلبس اللى على الحبل كله او الدولاب مش هيفرق بقا
المهم نكون ملعلعين كده اه وكمان الكوافير لازم الشعور كلها تبقا ليس(سايح ونايح) يعنى الناس كلها شعرها بيبقا مفرود وناعم وابن ناس معرفش ازاى بس اهو يوم يعنى متدقوش
ندخل على مرحله الميك اب والخلطات والماسكات والتكنى كلر اللى بنحطه بالوش طبعا مش افرض عريس مقطقط شافنا نعجبوه بالزحمه نطلع بعريس قولو امين

وجت اللحظه بقا ودخلنا القاعه كل بنت اجرت فستان اتاجر ولا مليون مره وكل واحده تشاور على فستان التانيه ,ده انا اجرته الشهر اللى فات
والتانيه فاكره انها داخله هى العروسه محدش زيها دى دافعه دم قلبها فيه على الله اى شحط ينطس فى نظره ويفكر الا خلاص الجيران كلت وشى
من هنا كان اهل العريس على الشمال واهل العروسه على اليمين معرفش ليه بس بيقولوا كده العروسه تبقا يمين يمكن فال حلو تعمر بالبيت
الكوشه منوره والعريس والعروسه قمررر طالعالى اكيد

الفرح كان مليان ستات من السن اللى عد عليه الزمن وولى ودول بقا هاتك يا كلام عن ايام زمان وفلانه خطبها فلان
*ايامنا مكنش الفرح كده اهى زياده مصاريف خلو الواد يكوع دم قلبه عشان ساعتين واخرتها هتطفحه الكوته
*ياستى اهو مشى بدماغه انا قلت له خد سلوى بنت اختى قالى دى زى اختى اهو راح شاف برا اما نشوف هتعمل فيه ايه
*تعمل ايه دول كاتبين عليه شيك بالمهر اكمنه مجهزش حاجه ياختى يعنى جوازه بلوشى وابوها اللى دافع القاعه والفرقه
*لا معقول اسكتى يا ام احمد ده انا ياختى سمعت ان الشبكه دى صينى ومش معرفين حد بس وحياتك هرشتها
*ياساتر يارب ايه البخل ده حته جاتوه واحده وقزازه حاجه ساقعه ايه الفرح القورديحى ده ياريتنا كلنا كويس بالغدا هنروح نتعشى تانى
*ايه ياختى الفرح ده العروسه عماله ترقص ولا الرقاصين ده انا كان يوم فرحى بقا وشى بالارض من الكسوف لاعاد فيه خشى ولا حيا

اما بقا البنات الى زى حالاتى
*سوسو ازيك وحشانى شفتى يابت التاتو ده من ساعه ما حطيته اتهريت معاكسه وحبه ولاد مقولكيش ولا حماقى ولا تموره
*بصى شفتى الواد اللى بيرقص هناك ده عينه ما اتشالتش من عليا وانا منفضاله هو امور بس الواد بتاعى واقفلى لو كلمته هتبقا ليله طين على دماغى
*بت يا لميا عامله الطرحه دى ازاى ياموكوسه دى خدت منى ساعتين ومعرفتش الفها كده وشى مش لايق عليها باين
*يلا بينا نروح نقرص ركبه العروسه عشان نحصلها وبالمره نهز شويه ونتصور بالفيديو كل الناس هتشوفنا على الشاشه امال كوافير واخد قد كده على قلبه ليه
*ايه ده فستان العروسه مش حلو خالص متخنها خالص ولا العريس حد يلبس بدله بيضا ايه العك ده وربنا انا احلى منها
*شفتى سماح ماشيه بتدلع واللى مش عاجبه يولع
اما بقا الولاد كان لهم كلام تانى خااااااالص
بلاش نقوله احسن عشان مش نضرب

طبعا الكلام كتر وهاتك يا نميمه ان كان من اهل العريس او اهل العروسه او المعازيم
سالت نفسى طب ياترى دلوقت العرسان سامعين الكلام ده ؟ ولا حتى فاهمين انهم عزموا ناس تنم عليهم؟
كلفوا الفرح او مكلفوش الناس مش عاجبها الحال يعنى لو حطينا حته جاتوه واحده او تورته الناس بردو جعانه
الله امال هما عملوا الفرح ليه اعزم ناس مش طايقه انى فرحانه!
من هنا سالت الحاجه الوالده يعنى احنا :ايه اللى مقعدنا وسط الناس دى؟
الحاجه :هش وطى صوتك الناس تقول ايه واجب ولازم يتعمل انت ايشفهمك بالحاجات دى
يعنى عشان واجب لازم اسمع كل الخلق دى ولازم اقعد هاديه ومبتسمه الا يقولوا عليا نكديه
واسلم على طنط وعمو ووشى بالارض منا مكسوفه بقا من ايه معرفش
اصل بصراحه السهوكه مش دليل الاحترام خالص ولا البحبحه بردو


*ياترى انتى لو بموقفى هتعملى ايه؟
*لو انتى عروسه هتعملى فرح الناس تيجى تنم عليكى انتى وعريسك بعد ما كلفتيه وطلع عين اهلك؟
*لو انت العريس تفتكر ساعتين يستاهلوا الكام الف اللى بتطلع محسود بيهم وفى الاخر هتاخد عروستك وباى باى؟
احنا ليه بنهتم بالناس قبل ما نشوف ايه يفرحنا احنا مش رقاصه ومزمار واخرتها هنروح الدار
وميعادى معاكو بالجلسه التانيه انتظرونى

جلسه نميمه

جلسات نميمه
النهارده وكل يوم بتعدى علينا احداث واخبار حاجه تزعل وحاجه تشرح القلب الحزين
كان لازم افضفض والا هطق من الغيظ وطبعا محدش يرضى بكده
حبيت اعمل دعوه للنميمه فقط
طبعا متشوقين تعرفوا هنم على مينجلسات نميمه
بس بردو مش هريحكوجلسات نميمه
ايه الغريب فى كده يعنى هو لازم ننم عن حد معين وناخد ذنوبجلسات نميمه
النميمه هنا فضفضه من اللى قلبك يحبها بدل ما الكبت خلاص جاب قفانا قدامنا
لا عارفين اذا كانا رايحين ولا جايين
حاجه تتوهجلسات نميمه
جلسات نميمه
قررت اعمل حزب جديد
اسمه
حزب نموا تصحوا
شعاره
فضفض وعيش احلى تهييسجلسات نميمه
وباعتبارى مسؤله عن الحزب
قول كل اللى نفسك
لا قلق ولا توتر ولا كلابوش
حلقات النميمه هتكون متتابعه من جلسه لجلسه
اللى موافقنى ينضم للحزب
واللى معترض يتفرج من بعيدجلسات نميمه
المهم تلحق تقعد فى اول صف
وانتظرووووونى مع اول جلسه نميمه
جلسات نميمه