زياره فول

الحلقه السادسه
زياره فول

امبارح على حين غره جالنا زياره من البلد اشى فطير مشلتت واشى جبن قريش ولبن طازه من ابو قشطه بالكيلو ده وطبعا ماقولوكوش على البط والوزه اللى فضحتنا وسط الجيران
طول النهار والليل تكاكى ولا اللى بتقول للجيران اللحمه جت ياناس
حسيت ان الوزه دى منظوره من قبل ما نتهنى بدبحها وكل ما ادخل ابصلها تجرى منى برقبتها الطويله دى يعنى على ماندبحها تكون امه لا اله الا الله اتفرجت علينا
كل ده حلو وجميل وسهل حاجه من الايد للبوق علطول جينا بقا لاخر الزياره شوال فول من اللى قلبك يحبه
اصل خلاص احنا مقطعينها مدمس ليل ونهار مخنا هنج منه
وطبعا شوال رز اصل اليومين دول الرز بقا فى الغالى يعنى اللى يلحق بقا
طبعا المفروض انى انقى الفول والرز اكيد من دنيبه وطوب
وقد كان قعده بصوانى وانقى واشيل


ولما صدقت خلصت وقلت اخيرا خلصت ,امى الله يصبحها ويمسيها بالف خير قال ايه اندلق الرز والفول مع بعض
وتعالى ياستى وافصلى الاتنين عن بعض يعنى مش بس هنقى لا وهفصل بقا
تقولوش هفصل القوات المسلحه وافصل ما بين مدرعات ومشاه
بقا حالى زى ماتقولوا كده واحد بيغرق وسط شوال رز بلولوق بلولوق
فى حل تانى!!! طبعا مفيش قلت اعمل اللى عليا وانجز
بعد حبتين لقيت امى المصونه والدره المكنونه بتنادى قال ايه لازم اعبى كل نص كيلو فى كيس لوحده عشان التخزين ولازم اوزن يعنى ميزان الدهب
والطبيعى هاخد فيها اعدام بميدان عام اصل خلاص لو زادت فوله او نقصت هنتقدم لمحاكمه عسكريه

كيست ووزنت وخلصت جه دور انى ابدا ادمس الفول واول ما يغلى نهدى النار وياخدله 5 او6 ساعات فواله وتراقبى كل شويه لحسن لو شاط الفول انا مش مسئول
فى عقل بالى وهو ايه اخره الغلبه دى ما بنص جنيه فول جاهز واخلص روحى ولا ساندوتشات لما يجيلنا مزاج له
انقى وافصل واوزن واكيس واسوى واهدى وبالاخر هو هو برده اسمه فول
وسألت امى انتى ليه بتعذبى فيا هو انا بنت الجيران يعنى
بكل بساطه اكتشفت ان كل ده مقصود انى انقى وتلخبطهم على بعض وافصل تانى واراقب تسويه
يعنى ده استغلال سلطات منزليه بقا وانا من هنا لهنا



كان المفروض اعمل ثوره واقولهم مش همد ايدى ولا ابص لفوله بعد كده
كان الرد التلقائى وبمنتهى البساطه
امال هتتعلمى الصبر ازاى!!!


يعنى يا امى هو لازم اتعلم الصبر لما يجى موقف ابقا اصبر الصبر مش واقف مستنينى يعنى
امى: ولما ولادك يكبروا وتساعديهم بمزاكره وتمرضيهم طول الليل ولما جوزك يحتاج مساعدتك ولما تكبرى بالسن وتتعبى هتصبرى على كل ده ازاى !!؟ لازم تتعلمى ومن قبلها
الدنيا مش كلمه بوقت عصبيه او حاجه زهقنا منها وخلاص نرميها
الدنيا صبر ,على عصبيه,على بلاء, على مرض ,على فقد عزيز
كده الدنيا مش هتصبر عليكى لو انتى مش صبرتى عليها
اتكلم انا؟!!طبعا محصلش ولا قدرت انطق
اصل الكلام بالصميم
ايوب صبر سنين هو صحيح انا مش ايوب بس على الاقل هقدر اتحمل كل اللى ممكن اصادفه عشان ارتاح فى حياتى


ودلوقت
العصبيه والتسرع تفتكر انهم اسرع وسيله للردعلى اى هجوم؟
لو انت مصبرتش على حد فى وقت زعله , تفتكر مين ممكن يصبر عليك بعصبيتك؟
اول قرار ممكن تاخده وانت متعصب بدون صبر هيكون هو نفسه وانت هادى وصابر؟
لو خسرت صديق وانت متعصب تفتكر كان ممكن ماتخسروش وانت هادى وصابر عليه؟
الصبر صفه تعلميه يعنى تقدر تتعلمها ,هل عندك استعداد انك تتعلم الصبر؟
وانتظرونى بالحلقه القادمه
بقلم
sodfa