ماشيه ساعه مغربيه اتمخطر وسط الزراعيه
شفت حبيبى على شط الترعه واقف مع صبيه
قلت انا خلاص كده خلصت القضيه
هاروح اديله كلمتين واخبط الصبيه كام روصيه
شلت طرف الجلبيه وجريت اديهم بالبونيه
قالى مالك يا زينه البنات انتى اللى فى قلبى للممات
اتعوج حاجبى تمانيتين وزغرت قال عامل فيها مسكين
يازينه البنات انتى ضنى العين طب اروح منك فين
كفايه عيونك لون النجيل وشعرك اللى بسواد الليل
واصلك وطيبه قلبك ولا خصرك النحيل
كده انا اتثبتت بكلمتين وقلت ببالى يابت خلاص بكره يبقا حلالى
وساعتها انا بس اللى هلالى ويتوب عن اللى فى بالى
وطالما يا بت شاريكى ولغايه دارك هيجيكى
كده مفيش صبيه هتقرب من حاجه ملك ليكى
وعدت ايام وليالى وانا نايمه بالعسل مطمنه
اتارى الغالى سايق الهبل على الشيطنه
منين ما اروح الاقى على كل شط بنيه
والغالى واقف يساعد ديه ويغازل ديه
جريت على جارتى ام اسماعيل
اشكيلها همى اصل بصراحه فاض بيا الكيل
ايه يا صبيه لاعيونك هيرجعوه ولا شعرك الطويل
ده صنف مفيش منه رجا لابينهد ولا بيرتجا
واسالينى انا ياما شفت منهم ويل وضنا
عاوزه ترتاحى وتعيشى انسى ومتفكريش
اصلك مهما قلتى وللخايب نصحتى برده البعيد مبيختشيش
انا خدت الكلمتين وفى راسى الف يمين
يا اما يمشى عدل ويسيب بهانه وخضره وسنيه
يا اما اخد بوشى وابعد انا من الليله ديه
ولا هتمشى معايا كلمه انه راجل وله من الحريم ميه
بعتله مرسال اشوف الليله هتمشى من انهى شط وانهى ميه
ورجعلى مرساله اعقلى يا صبيه انا جاى وجايب من الجمال ميه
وكردان دهب من الغالى وخلخال بيرن وبيلالى
علقى الزينات وبلى الشربات ده انا جايب اهلى وعزوتى
لاجل ما يقروا فاتحتى اصل مفيش غيرك فى قلبى يا مهجتى
والله صدقتى يا ام اسماعيل كلامك كله فى السليم
طول ما انا فى دارى هيجى اللى يصونى ويعرف مقدارى
ليست هناك تعليقات:
إرسال تعليق